mardi 22 avril 2008
22:58

هارب :اللص, عرب و ازواو


يخافو من الشمس كي تزرق ومن الرعد كي يتكلّم ومن النّهد كي يتفجّر والغثيث كيف يظلّم
يخافو من المحبة يخافو من قلوبهم لا توجع يخافو لا يتهردو ويبكو من الوحش
يخافو من النوار كيف يشعشع و من الشوك كيف يشكك و من الموج كيف يكشكش و من الوادكيف يهدر و من دقات القلب كيف تقول الحق
يخافو من الشمس اللى تحرق يخافو من الموجة اللى تغرّق يخافو من الصوت اللى يجهر ويقول الحق
يخافو مالعين الّي تبكي يخافو مالبسمة الّي تدغدغ
يخافو من الريح كيف تهبهب و من الماء كيف يسرسر و من اليد كيف تتحنن على الخد الأملس و من العين كيف تدمع و من الفم كي يتبسم و من النفس كيف يتوقف و يقول : انحبك
يخافو من جناحات الحلمة يخافو من سرحة الآه وغصة وينو ؟؟؟؟؟؟؟؟؟؟؟؟وزعمة لواه؟؟
يخافو مالمسؤوليّة ...مالأنثى كيف تسأل
يخافو من حروف الحاء و الباء و الهاء و الأبجدية وقت اللي ما تغرف كان هبوب الهوى
كيف تقلّو ايجا ,نحبّك, فينك توحّشتك
يخافو لا يكبرو و يطيرو فوق السحاب
يخافو
يخافو من سهر الليالي و من ضل الدوالي و عشق اللي سلم في اللي وراه و اللي التالي
يخافو من نهار غدوة
يخافو كي تظلام الدنيا تهرب بيهم اى حلمة لخيالات عزيزة عليهم
يخافو من الرعشة في أطراف الصوابع و الرجفة في محيرات المواجع و النشدة اللي تقول تحبني و الا استانست بي و ما عاد عندك كيف بي و تخلطت عليك الثنية
يخافو من مرا حنينة تسهر الليل تغني غناية طويلة
يخافو من ليل الوحش من البعد من الحيرة من السكات المر ومن هيجة القلب العاشق
يخافو مالبنّة, مالحشمة, مالرّيحة الفوّاحة
آشكون باش يلم الكلام و يسدسو كيف العقد على صدر الحمام و يهز بالصوت و يشرقع و يفيق النيّام
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه
يخافو من التنهيدة ومن الامنيات البعيدة ومن ريق الحبيبة
فينك مع شكون كنت, شبيك ما طلبتش
اسمعني راني فادة اسمعني نحب نحكيلك
موش هذا ملام في قلب المضام و سيوف مسلولة مرشوقة فى قلب المحبّة
يخافو
يخافو من آه و أه و اللي كي تلوج عليه ما تلقاه و اللي في بالك حبيبك و معشوقك لقلبك موش هو دواه
يخافو من الاه والاه واللى كي تتعب تفركس على سماه تحبّ طير وتجنّح تلقاه حرن وهرب وقعدت كان ذكراه
يخافو من الحنانة و كلمة الزعبانة و عشقة الفنّانة و اللي تحسب روحها ما بينها و بينه كان اللي متاعي متاعك و اللي في جواجي ليك و اللي تحلم بيه غدوة نجطو بين إيديك
يخافو من كلمة هيا وينك وقتاش تجي
يخافو من الليل من تغريد الطير من نغمة العود الحزين من رعشة بدن دافي بين يديهم شاهي يضيع ويطير
اللص يهز الكل لم الكلام و هبطو في أحسن نظام و احكيه للكبير و للصغير خللي يفهموه اللي بعقولاتهم و اللي بلاش
انتي السبب و انتي كوكب حنانة و حب و اللي يتبعك طال الزمان و الا قصر يا يتكلب يا يتجذب

11 commentaires:

Gouverneur de Normalland a dit…

Bravooooooooo


tres beau texte

une trés belle experience et un tres bon niveau. on se re-ga-le

je suis meme jaloux, la derniere experience j'etais avec vous

Anonyme a dit…

غيــــــــــــــــبتك يا محافظ
هههههههههههههههههههه

نطفة a dit…

حلوة ياسر

brastos a dit…

تداعيات مزيانة..و خاصة الفكرة .. و انا مع انها تولّي تقليد ..

هارب ، اللي في العنوان ، من الهروب ؟؟ و الا الهارب الآلة الموسيقية متاع الفراعنة؟؟
على كل هو كل حد يقراها كيما يحب .. و بالنسبه ليّ هالنص هو تقسيم على آلة الهارب .. و انتوما أوتارها .
bravo

HNANI a dit…

حلوة برشا و يعطيك الصحّة

dalida a dit…

bravo bravo bravo
excellent!!

Anonyme a dit…

الليل سمّـاع، و الحديث تبّاع، و قبي العاشق ملتاع و البنات خمسة و خميس عليهم و عيني ما تضرهم بــــــــــــــــاع و ذراااااااااااااع. اللحظة سحرية برغم الدنيا مرزية و ثناياها مظلمة و محفرة تهدالاعمار.

Anonyme a dit…

j suppoze k c une impro... félicitation... ton9och laslousa wal majmou3a....
elli 5af enjé...et kom di sesmou lé5ir... chtar errjoulya hroub...:p

dalida a dit…

je demande l'autorisation pour reposter ce magnifique texte dans mon blog!!

Dodo a dit…

....
.........
............
...............
......................
..........................
.................................
....................................
C'est époustouflant!!!!!!!!!!!
Que dire de plus?
Chapeau bas à vous trois
نحبكم برشا

titof a dit…

بدون تعليق