lundi 10 novembre 2008
10:59

دعوة ملحة لعودة أرابيكا بيننا 2


Texte improvisé par Azwaw, Arabicca et moi même, le 22 Avril 2008


يخافو من الشمس كي تزرق ومن الرعد كي يتكلّم ومن النّهد كي يتفجّر والغثيث كيف يظلّم

يخافو من المحبة يخافو من قلوبهم لا توجع يخافو لا يتهردو ويبكو من الوحش
يخافو من النوار كيف يشعشع و من الشوك كيف يشكك و من الموج كيف يكشكش و من الوادكيف يهدر و من دقات القلب كيف تقول الحق
يخافو من الشمس اللى تحرق يخافو من الموجة اللى تغرّق يخافو من الصوت اللى يجهر ويقول الحق
يخافو مالعين الّي تبكي يخافو مالبسمة الّي تدغدغ
يخافو من الريح كيف تهبهب و من الماء كيف يسرسر و من اليد كيف تتحنن على الخد الأملس و من العين كيف تدمع و من الفم كي يتبسم و من النفس كيف يتوقف و يقول : انحبك
يخافو من جناحات الحلمة يخافو من سرحة الآه وغصة وينو ؟؟؟؟؟؟؟؟؟؟؟؟وزعمة لواه؟؟
يخافو مالمسؤوليّة ...مالأنثى كيف تسأل
يخافو من حروف الحاء و الباء و الهاء و الأبجدية وقت اللي ما تغرف كان هبوب الهوى
كيف تقلّو ايجا ,نحبّك, فينك توحّشتك
يخافو لا يكبرو و يطيرو فوق السحاب
يخافو
يخافو من سهر الليالي و من ضل الدوالي و عشق اللي سلم في اللي وراه و اللي التالي
يخافو من نهار غدوة
يخافو كي تظلام الدنيا تهرب بيهم اى حلمة لخيالات عزيزة عليهم
يخافو من الرعشة في أطراف الصوابع و الرجفة في محيرات المواجع و النشدة اللي تقول تحبني و الا استانست بي و ما عاد عندك كيف بي و تخلطت عليك الثنية
يخافو من مرا حنينة تسهر الليل تغني غناية طويلة
يخافو من ليل الوحش من البعد من الحيرة من السكات المر ومن هيجة القلب العاشق
يخافو مالبنّة, مالحشمة, مالرّيحة الفوّاحة
آشكون باش يلم الكلام و يسدسو كيف العقد على صدر الحمام و يهز بالصوت و يشرقع و يفيق النيّام
آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه
يخافو من التنهيدة ومن الامنيات البعيدة ومن ريق الحبيبة
فينك مع شكون كنت, شبيك ما طلبتش
اسمعني راني فادة اسمعني نحب نحكيلك
موش هذا ملام في قلب المضام و سيوف مسلولة مرشوقة فى قلب المحبّة
يخافو
يخافو من آه و أه و اللي كي تلوج عليه ما تلقاه و اللي في بالك حبيبك و معشوقك لقلبك موش هو دواه
يخافو من الاه والاه واللى كي تتعب تفركس على سماه تحبّ طير وتجنّح تلقاه حرن وهرب وقعدت كان ذكراه
يخافو من الحنانة و كلمة الزعبانة و عشقة الفنّانة و اللي تحسب روحها ما بينها و بينه كان اللي متاعي متاعك و اللي في جواجي ليك و اللي تحلم بيه غدوة نجطو بين إيديك
يخافو من كلمة هيا وينك وقتاش تجي
يخافو من الليل من تغريد الطير من نغمة العود الحزين من رعشة بدن دافي بين يديهم شاهي يضيع ويطير
اللص يهز الكل لم الكلام و هبطو في أحسن نظام و احكيه للكبير و للصغير خللي يفهموه اللي بعقولاتهم و اللي بلاش
انتي السبب و انتي كوكب حنانة و حب و اللي يتبعك طال الزمان و الا قصر يا يتكلب يا يتجذب

6 commentaires:

ART.ticuler a dit…

رائع

ferrrrr a dit…

Toute ma solidarité avec Arabica, je propose d'ouvrir nos blogs temporairement pour des publications eventuelles d'Arabica

L'AsNumberOne a dit…

@art.ticuler: c'était un moment magique, nous avons eu beaucoup, de réaction suite à ce poste
@ferrrrr: bonne idée, je suis partante

Anonyme a dit…

J'ai eu l'impression une seconde de le lire pour la première fois!!!! En effet L'As ce fût un moment magique inoubliable ينعبو الدنيا

Anonyme a dit…

ش ش ش ش
شاهية
شــــــاهية يا سيدي يا بن سيدي
أستغفر الله العظيم ,
أستغفر اللّه العظيم ,
أستغفر اللّه العظيم,
شـــــاهية .....نبلـــــــع
...............
هو من ناحية ميتافيزيقيّة بحتة قلّك حرام تبلع هكّاكة
اتكون قاعد اتقوم تعمل كورده والاّ اتذوّب شويّة "دى دى تى" والاّ "فتاّك " والاّ ترمى روحك من جبل الشعانبي
كي اتّحب تبلع لازمك تحسبها مليح
هي ماهى عيشة ...شنوة اسمها يا ربيّ ؟
- : سلاطة
- : بولد القمرة
- : ولد القمرة شكون بوه؟
هي العيشة سلاطة سلاطة ولذا كي تبلع على القليلة لازمك تبدى امدبّر راسك في ستيديو في الجنة والاّ حياتك مشات سبهلالا
والستيديو هذا من الباب الواطي وكان ما كلفكشي ولو كان ما خذيناش في آعتباراتنا ارتفاع أسعار المحروقات لازمو على الأقّل على الأقّل عمليّة آستشهاديّة
الحكاية مكلفة بصراحة ....سبتة وحزام وأش اسمو الأخر وشبعة فوشيك ....
- : الواحد لو كان جاء في سراه ممكن أّما هو ما لزّو كان بو لزّاز
- : امّالا علاش شهى يبلع ؟
وزيد الحمد لله يا ربّي دوّم علينا النعمة متاع الرّخاء و رغد العيش في خضراء لاند الأمن والأمان طالع من خشاشاتنا
فاش قام الواحد يطرشق آفّادو امّالا ؟ مافمّاش علاش
من أحلى ما قريت لارابيكا خسارة مشات

Anonyme a dit…

ش ش ش ش
شاهية
شــــــاهية يا سيدي يا بن سيدي
أستغفر الله العظيم ,
أستغفر اللّه العظيم ,
أستغفر اللّه العظيم,
شـــــاهية .....نبلـــــــع
...............
هو من ناحية ميتافيزيقيّة بحتة قلّك حرام تبلع هكّاكة
اتكون قاعد اتقوم تعمل كورده والاّ اتذوّب شويّة "دى دى تى" والاّ "فتاّك " والاّ ترمى روحك من جبل الشعانبي
كي اتّحب تبلع لازمك تحسبها مليح
هي ماهى عيشة ...شنوة اسمها يا ربيّ ؟
- : سلاطة
- : بولد القمرة
- : ولد القمرة شكون بوه؟
هي العيشة سلاطة سلاطة ولذا كي تبلع على القليلة لازمك تبدى امدبّر راسك في ستيديو في الجنة والاّ حياتك مشات سبهلالا
والستيديو هذا من الباب الواطي وكان ما كلفكشي ولو كان ما خذيناش في آعتباراتنا ارتفاع أسعار المحروقات لازمو على الأقّل على الأقّل عمليّة آستشهاديّة
الحكاية مكلفة بصراحة ....سبتة وحزام وأش اسمو الأخر وشبعة فوشيك ....
- : الواحد لو كان جاء في سراه ممكن أّما هو ما لزّو كان بو لزّاز
- : امّالا علاش شهى يبلع ؟
وزيد الحمد لله يا ربّي دوّم علينا النعمة متاع الرّخاء و رغد العيش في خضراء لاند الأمن والأمان طالع من خشاشاتنا
فاش قام الواحد يطرشق آفّادو امّالا ؟ مافمّاش علاش
من أحلى ما قريت لارابيكا خسارة مشات
النص اسمو "شهوة صبية" خسارة