vendredi 16 mai 2008
21:01

قفصة: الحقيقة الكاملة


النّاس الكل تحكي على قفصة و على إضرابات قفصة و على عمّال مناجم قفصة. أنا بيني و بينكم ما كنتش فاهمة مليح شنوّة الّي صاير. ايّا قلت ما خيرش من اني نمشي على عين المكان. قادتني الصدفة و رب صدفة خير من ألف ميعاد اني نمشي إلى ربوع قفصة.
كان ماشي في بالي الي فما مشاكل لكني انبهرت بالشي الي ريتو. ايا سيدي شدو عندكم. شباب منشر كيف نوار العشية فرادى و جماعات, الابتسامة تعلو ثغر كل واحد منهم, الكراهب ماشية جاية, المرشي امورو هايلة. يا قرنفل يا دلاع, يا معدنوس, يا لحومات, يا قهاوي و أم كلثوم تشرقع" بعيد عنك حياتي عذاب" و كويس تاي من هوني و هات ولعة من غادي و زويز كابوسان للشباب...
الخضار و النوار مزين الشوارع...
و زاد ها المنضر حلاوة اللافتاتوووو الي مزينة الكياسات.
ربيع قفصة للمسرح
ايام قفصة للفنون
بلدية الرديف تحتفل بالماؤوية....
انا من منطلق متاعي الشخصي نحب نطمن كل تونسي غيور على بلادووو إلي أحنا رانا لاباس.... الكلها ايييشششااااععااااتتتت... حاسدينااا الأعداء متاعنا على رغد العيش الي ننعمو بيه
محلاكم يا أولاد بلادي و عيني ما تضركم في قلبان الفيستة و تتليف الجرّة.

10 commentaires:

Anonyme a dit…

امالا وينك انت امالا باش احنا توانسة كان موش لاباس الحمد الله كاس تاى سيقارو والا ولعة عينينا مرشوقة في بالمكشوف نتبعو في عرك الستادات الكل نتعاركو على الجلد المدوّر امّا الجلد اللى يتحرق ويموت ويفنى ويتغدر نحاصروه ونغرقوه في السكات وديما لاباس لا لاباس لا سو لا سوية

Nakhlet Oued el-Bey a dit…

الحمد لله بشّرتينا الله يبشّرك بالجنة
آش بينا هالله هالله آش بينا الخمسة و الخميس علينا

HNANI a dit…

يا لاس يا بنتي، كان مالقيتش ستيلو أخضر قلي
وانت آش إمهزك لقفصة في هالسخانة؟ ربي يهديك

Bel Malwene a dit…

طمنتني يا لص الله يطمن قلبك ... وأنا كنت مفجوع و داخل بعضي ... أبدعععععععععععععععععت

abunadem marzouki a dit…

عاد انت وصلت غادي كملت مشيت لمهرجان الشعر في المتلوي هاهي الصحافة تغطي فيه كانو مهرجان دولي والا باش يوزعو فيه اوسكارات هولييود
http://www.essahafa.info.tn/thakafa/article3.html

mystere a dit…

فرحتني يا لص يفرح قلبك اليوم طمنت و انجم نرقد مرتاح البال على ابناء قفصة و رغد العيش و البحبوحة الي ينعمو بيها و هو احسن رد للعباد الي تسرب في الاشاعات و تصطاد في الماء العكر و نحن لهم بالمرصادحتى ما يعكروش المسيرة التنموية العظيمة الي حسدونا عليهاو التي بلغت صداها اصقاع العالم

البرباش a dit…

يرحم والديك على هـ البشارة... يلزم العبد ديمه يبتسم على خاطرو موش اللي يجي و عايش فين يجي

Gley Yahya a dit…

تحبوا نزيد نطمنكم إلي أولاد قفصة عاملين إضراب على خاطر يحبوا يكلوا لحم الغزال 4 مرات في الشهر موش مرتين. تتو هذا معقول بجاه ربي؟ تماهو نحافظوا شوية على الثره الحيوانية متاعنا باش ولادنا يلقوا ما يكلوا كيفنا.

Unknown a dit…

اول شي النبارة الاجانب يخرجو منها ومستحيل اي تونسي يرضى باستعمار جديد ظحاو عليه اجدادنا.
في تونس تحققت برشا حاجات وما زلنا نطمحو للاكثر
والبطلة ازمة عالمية علاقل فتونس فمة حلول 8بعث مؤسسات صغرى8 قبل ترهن دارك باش تاخو قرض توا يكفي فكرة وتتحصل ع قرض اللي يحب يخدم يكفيه يتوجه لمحاضن المؤسسات في اي iset

mimou a dit…

ili ya7ki 3la gafsa wya3arafhech a7sen yoskot ya twensa!! ta7kiw 3la raghad l3aych wintouma nhar lkol t3issou 3la b3adhkom winti ya nakhlit oued il bey mati7chimch 3la rou7ek !! chbik na9setk 7aja tgoul lwe7d barani ybachrik bil5ir?????????