vendredi 27 mars 2009
10:00

باقات... قعدة حبيبات


في نهار ربيع و الشمس زارقة. خرج عياض يتمشّى على الشط و يستمتع بزقزقة العصافير و اشعة الشمس و صوت أمواج البحر... يجري و ينقز من سربوحة لسربوحة

و فجأة نوقز تاليفونو... الكنيسية اللي في الحومة حاجتهم بيه في شوية بريكولاج، ماهو غدوة عندهم احتفالات متاع احياء وحدة مالذكريات. الكنيسية ما قعد فيها كان الاسم. ماعادش معبد متاع نصارى و وتم تحويلها الى لجنة (موش لازم نقولو متاع شنوّة) منذ الاستقلال

طلع للصمعة يصلّح في الانستلاسيون متاع الضو و يجرب في الابواق... خرّج راسو مالشباك يطل على الحومة...تفلت ساعتو اليدوية من يدّو و تطيح اللوطى. يجمع قواه الكل، يجبد النفس مليح و ينقز يخلط على المنقالة باش يجيبها...

بالصدفة متعدي كميون في الكيّاس، يبرّح "برقدانة بميا، برقدانة بميا..."

الشيفور يسوق في خنسولة جديدة من باكوها اخر مودال، حاطط الرديون بالقوي... يسمع في برشة مساطة و ضمار فارغ قاعدين يتعدّاو في اذاعة فسيفساء... بدّل الموجة، يلقى عبد الحليم يتفنن و يعاود: "قدر أحمق الخطى.... قدري" عمل بون كيف، تكّا الكرسي اللتالي شويّة و شد ثنيّة المطار.

و هو شايخ مولى الدار موش هوني، يشوف في عياض هابط مالسماء. فرك عينيه، عمل رشفة من كانات البوقا اللي حذاه: "يا ربّي؟؟

ماللول شك، قال بالكشي الدنيا ضلام و أنا كيف العادة مانيش مشعّل الضو حفاظا على الطّاقة. جبد بريكيتو و شعّل الامبوبة...

ماهو منذ انتصاب الحماية في البلاد عام 1881 البلاد تطورت بصيفة كبيرة، و الناس تفرهدت و العقليّات تبدلت. الشّباب ولّاو الاختراع في جرّت الاختراع. ياحسرة على ايامات النوفي و اللص يهز الكل و الرامي و البولوت.... الخ

لا يتبع...

5 commentaires:

kmr a dit…

لا يتبع???


علاه اللطف!! ما تقول هالكلام!!!

:)

البرباش a dit…

لا يتبع... هههههه

معناها شعفة يا داوود كان مازلت انعاود

:-))))

Nomade a dit…

لا يتبع
?
معناها نقعدو زَزوة كيما في كيف نتفرّجو على
court-métrage?

l'AsNumberOne a dit…

لا هذيكة لا يتبع جوست باش الناس اللي تقرا و ما تفهم شي مالنص متاعي اللي هو لا راس لا ساس، ما يمشيش في بالها اللي هي حكاية و تستنى كمالتها باش تفهمها

الربح من الانترنت a dit…

الف شكر على الموضوع الرائع
التسويق الالكتروني
bookmarks