البارح

حبّيت نكتب, و نكتب حكاية طويلة. طول الزمان الي بعّدنا علّي كان. كنّا صغار و كنا نحلمو: قصر شكلاطة, كميونة حلوى, عروسة تتكلم, تغنّي, تبكي و الّا تسلّم...
كنّا نجريو, نطيحو, نتكربسو, نتمرمدو و نكملو نغنّيوو... آش تحب تولّي؟؟؟ ... طبيب, محامي و الّا بيلوت...
يزّي مالجّري توةاطّيح, توّة تمسّخ حوايجك... يزّي ريض...
ما كنّاش نخافو لا مالطياح لا مالوجيعة لا مالدمومات... ما كنّا نخافو كان مالغول و الاّ مالعبّيثة...
البارح كنّا صغار, ما كنّاش نخافو لا نكبرو, كنّا نحلمو حلمات بسيطة و ما كنّاش نعرفو نحسبو
- واحد مع واحد؟ يولّيو برشة حاجات,
- اي قدّاش؟ مانعرش المفيد الواحد عمرو ما يقعد وحدو.
البارح كنّا صغار و فمّا شكون فينا كان يخاف مالطهّار و الّي كان يخاف كان يحل على فمّو و يصيح يعيّط ...يعبّط... يعيّط و يجري و ماكانش يخاف لا يبكش و لاّ يطيح.
ما كان حدّ ينجّم يسكّتنا و لا يحكم علينا و لا يحاسبنا.
كنّا نلعبو, عروسة و عروس, أم و بو, سرّاق و بوليسيّة, معلّم و تلامذة....
البارح كنّا صغار و حلماتنا كانو كبار.
اليوم كبرنا و احلامنا ما ولّاوش كبار.
في الاخر ما نجمتش نكتب حكاية طويلة